ஆமிக்காரன்

ஆமிக்காரன் ஆவது மிக எளிது
இலக்கற்று குண்டுகள் வீசலாம்
ஒரு ரைபிளை எப்படியும் கையாளலாம்
அது உங்கள்  பக்கம்  திரும்பாதவரை

பயிற்சி குறித்து கவலை கொள்ளாதீர்கள்
பதுங்கு குழிகளும் பள்ளிக்கூரைகளும்
பயிற்சி கொண்டு தாக்க வேண்டியவையல்ல

பேருந்து மீது கல்லெறியாதீர்கள்
அது உங்கள் அரசாங்கத்தினுடையது
ஆசிட் வீசாதீர்கள்
அது ரவுடிகளுக்கானது

கடையடைப்பு
மறியல்
உண்ணாவிரதம்
வேலைநிறுத்தம்
புரட்சி
போராட்டம்

ம்ஹூம்

எதுவும் உங்களுக்கு விதிக்கப்பட்டதல்ல

யுத்த கால இரவுகளில்
நீங்கள் செய்யவேண்டியதெல்லாம்
முடிவற்ற வன்புணர்ச்சி

நீங்கள் கொள்ள வேண்டியதெல்லாம்
பேரினவாதத்தின் பெருமை பீற்றல்